ليه مصر كده ؟؟ .. ليه كده ؟؟؟

من طرف **_MaFia_** الأربعاء ديسمبر 22, 2010 12:37 pm

انا لما بسال ليه مصر كده؟
مش قصدى استعرض سلبيات مجتمعنا واقول كلام مكرر بصيغ تانيه لاننا كلنا بلا استثناء عارفين ايه هى سلبيات مجتمعنا بدليل انك لو سالت واحد حشاش ايه هى السلبيات هيرد ويقول بكل ثقه (الادمان)

لكن اللى خلانى اسال السؤال ده اننا لو لاحظنا فى البرامج الحواريه اللى على المليون قناه الفضائيه ولا حتى الارضيه نلاقيهم بيتكلمو ويلفو ويدورو حوالين نفس المنطقه ونلاقى مصر واخده نصيب الاسد فمناقشة اوضاعها المترديه .. زى ما يكون مصر هى البلد الوحيده اللى فيها مشاكل.. ديما وابدا نلاقى مصر مشرفه على راس مواضيع اى برنامج.. ليه كده ؟؟.. معرفش..

وسؤال تانى..ليه بيقولو عننا دوله متخلفه..ناميه..عالم تالت..وكلام معناه ان مصر دوله دون المستوى مع انها فيها من كل صنف ولون
يعنى مثلا
* بلد الحضارات بدءا من الفرعونيه مرورا بحضاره اليهود والقبطيه حتى الحضاره الاسلاميه
* وفيها صروح تكنولوجيه حديثه
* وجيشنا ماشاءالله عليه زى الفل
* وعندنا اراضى خصبه وصحرا قابله للاستصلاح
* وبترول ومناجم لمعادن كتير
* وفيها موارد مستغله ومعطله محتاجه اللى يستغلها
* ونهر النيل وبحر احمر ومتوسط وكل حاجه فيها..

معرفش ليه احنا دوله متخلفه مع ان عندنا كل ده.. اعتقد لو دوله تانيه عندها ولو نص موارد مصر كانت بقت جنه.. طب ليه احنا مش كده؟.. معرفش..

ولو قلنا الحكومه السبب هنلاقيه سبب ضعيف.. عارفين ليه.. لاننا اتعودنا نعترض لمجرد الاعتراض.. ونتمرد على اى وضع لمجرد التمرد..

ولو قلنا اتغيرى يا حكومه وجه حزب تانى غير الوطنى اللى مزعل الناس ده هيكون مقابل بالرفض والاستنكار ودى حقيقه منحولش ننكرها.. والدليل ان مفيش رئيس مسك مصر الا وكان له اعداء كتير بيطلعو فيه القطط الفاطسه وديما نقول فشل النظام فاصلاح مش عارفه ايه وكلام بيتردد من وقت للتانى مش فاهمين معناه واهو بنردد وخلاص عشان يبقى اسمنا معترضين

صدقونى لو جه حزب الوفد مثلا وبقى الوفد هو الحزب الحاكم كلها كانت سنه ولا اتنين ونعد نسال نفسنا فين الاصلاح.. هو فين وكانه عيل تايه مش عارفين نلاقيه.. وكان هيبقى الوفد راس من رؤوس الفساد الواجب استئصالها ونعد نسب ونلعن فحزب الوفد واللى جابو حزب الوفد..

ولو قلنا الاخوان اللى ناس كتير متعاطفه معاهم كنا هنستنكر كتير من تصرفاتهم ونقول ايه التزمت ده...

ولو كان ايمن نور بتاع حزب الغد اللى الناس كانت تشجعه كنا هنقول عليه لص ومنافق وخارب الدنيا ويمكن يكون مبيعملش حاجه.. لكن ازاى مهو الريس يبقى لازم يكون حرامى ومنافق...

واى وزاره تيجى اى وزير فيها او اى مسئول حرامى كبير ومنافق وكلهم شله منافقين عاوزين الدبح

صدقونى ده هيكون كلامنا فاى حال من الاحوال..يعنى نخلص من احتلال برانى يطلعلنا احتلال جوانى (حاميها حراميها)..وسؤال هو العيب فينا ولا فى المسئولين؟؟؟؟

حاجه كمان.. ليه بقى فى البرامج الناريه اقصد الحواريه يعملو مباراه بين الحكومه والمعارضه..
- المعارضه مش عاجبهم والحكومه بتحمل المقصرين المسئوليه.
- المعارضه عاوزين اصلاح والحكومه بيرددوا كلام حافظاينه وكاننا ف حصه تلقين..ليه كده؟ ليه مسئولين مصر ديما بيقعو فريسه البرامج دى ليه ؟؟ والغريب ان مقدمى البرامج دى مصريين ؟؟؟

وسؤال كمان ليه هدف البرامج دى انهم يمسكو فحكام مصر اللى ماتو واللى عايشين عمالين قطعو ففروتهم ويحللو ويفسرو ما الحكام كتير والفساد فكل مكان لكن ازاى دى مصر برضه ليها وضع تانى نلاقيهم ماسكين سلسال محمد على واللى عملوه فمصر ومحمد نجيب اللى ملحقش يتهنى بالحكم وجمال عبد الناصر اللى شفطه منه والسادات اللى كان معرفش ايه ومبارك اللى بيعمل ايه....ليه كده يعنى ؟؟..معرفش..

وايه حكاية الصوره البايخه بتاعة مجلش الشعب دى..نواب نايمين جايين عشان يسقفو وبس واى قرار..الموافق على البند كذا فى القرار كذا والقانون رقم ايه لسنة كام يتفضل برفع يده..من غير ما يبص موافقه..الا عمرى ما شفت معارضه ابدا من تاريخ المجلس الا مرتين تلاته..ليه الصوره دى ؟؟..معرفش..

والمشكله عمرها ما كانت فى الريس ولا المسئولين ما احنا جمهوريه مش مملكه عشان نخاف من صاحب السمو..

واضح كده ان المشكله فينا احنا.. نفسى افهم ليه بقينا كده فين ايام ما كان الجنيه بخمسه دولار.. فين .. فيييييييييييييييييين .. دلوقتى الدولار ب 5 جنيه يعنى الحكايه اتعكست ؟؟

وبكررها المشكله فعلا شكلها فينا احنا ((ان الله لا يغير ما بقوم حتى يغيرو ما بانفسهم)) ولحد ما نتغير يفضل السؤال ........ ليه مصر كده ؟؟؟